يمر العالم كله بأزمة كبيرة وهى أنفلونزا الخنازير , ومصر قرية في العالم
وعلشان حكومتنا حكومة ذكية وأختها بهيه , قررت أن تغلق الفصول !
وعلشان مصر كبيرة أوى فكان لازم تصاب بانفلونزا الطيور !
وقالوا أن أنفلونزا الجديان والسخلان المعيز يعنى وصلت !
طيب إيه رأيك يا حكومة ؟
المنوط بالحكومة السيد رئيس مجلس الوزراء , أول ما تسأل قال :
أنا نظيف من إي انفلونزا , وقرر معاليه أجتماع مفتوح خوفا من توابع
الإنفلونزا , فكان الاجتماع مفتوح والبوفية مفتوح والجيوب مفتوحه !
وهنا سأل معالى الوزير سؤال لرئيس هيئة السكك الحديدية , إيه استعدادات
وزارتك في الهيئة وانفلونزا المعيز على الأبواب ؟
ضبط نفسك , يمكن تكون الوزير الخالي !
اقترح رئيس هيئة سكك حديد مصر بالقول : ياريس هانجمع كل المصابين
وفي قطر واحد ونشويهم ياريس , وهو نخلص البلد منهم ونقلل عدد ؟
رئيس مجلس الوزراء حك في شنبه ناصع البياض وقال : دى تبقى جريمة !
غمزه مدير مكتبه وأومىء هى دى أول مرة يا ريس ؟ فسكت !
سأل وزير الطيران المدنى .. وماذا عن هيئتكم الموقرة ؟
والله ياريس لو حبكت هاناخد المصابين ونبعتهم أم درمان ونوصى
جمهور الجزائر الشقيق وهما هايتصرفوا !
اشتاط رئيس الوزراء وصرخ أنتو هاتجننونى .. عاوزين تشلونى !
صمت رهيب .. طيب بلاش ياريس نغير الخطة , وماتزعلش نفسك !
أكمل معالي رئيس الوزراء قائلا .. أنتم أغبياء لآن اللقاء القادم مع الجزائر
هايكون في أنجولا ومش أم درمان .. عاوزين الناس تبهدلنا وتشمت فينا !
وسأل وزير التربية الموقر .. طيب أنت هاتعمل ايه يا معالى وزير التربية ؟
أنت مسؤولياتك كبيرة , وانت عليك العين , عيالنا قصدى عيال الغلابة عندك !
قال معالى وزير التربية وهو يحمل دوسيهات وأوراق كثيرة , عندى أكثر من خطة
هاعرض على سيادتك وانت اختار ياريس الخطة اللي تشوفها مناسبة !
معالى رئيس الوزراء .. هات ياسيدى ماعندك
الخطة الأولى ياريس التعليم عن بُعد .. ونحن لدينا قرية ذكية , ومن خلال
الإنترنت يمكن للطلبة التعلم والامتحان لغاية ماتعدى المصيبة دى !
رد وزير المالية وهو يهرش في الفراغ اللي أم رأسه , يقول :
أنا ماعنديش فلوس , لآنك ياريس هاتطالبنى بتوفير فلوس لشراء
أجهزة كمبيوتر لكل مواطن , وهاندخل لهم نت , والميزانية بح !
رئيس الوزراء .. بتهبب إيه يا بطرس .. رد بطرس دايما والدى يقول لى
الكلمة دى .. حتى أما قررت أزود الضرائب العقارية قال لي بتهبب ايه !
رئيس الوزراء .. طيب الخطة التانيه ايه يا سيدى ؟
الخطة التانية معاليك .. الناس بتتفرج على التلفزيونات , والمسلسلات
ومفيش بيت مصري ماعندوش تلفزيون ..
رئيس الوزراء .. وإيه علاقة التلفزيون بالموضوع .. يكونش قصدك
برامج تعليمية ؟
وزير التربية .. لا يا ريس , البرامج التعليمية مفيش حد بيعبرها .. طيب والحل ؟
الحل ياريس تكون المسلسلات المنهج , ومن خلال المسلسلات تكون الأسئلة !
ابتسم معالى رئيس الوزراء وقال : قصدك على طريقة وجيجى قابلته في الحلقة الــكم ؟
وزير التربية .. هو ده ياريس !